Naxçıvan Muxtar Respublikası Əmək və Əhalinin Sosial Müdafiəsi Nazirliyinin tabeliyində Dövlət Tibbi Sosial Ekspertiza və Reabilitasiya Agentliyinin “Rehabus” layihəsinə start verilib.

Nazirliyin mətbuat xidmətindən bildirilib ki, bu il fevralın 1-dən icrasına başlanılan layihə əlilliyi olan şəxslərin ambulator reabilitasiya xidmətlərinə əlçatanlığına yönəlib. Reabilitasiya avtobusu müvafiq kateqoriyadan olan şəxslərin reabilitasiya müəssisələrinə asan, rahat şəkildə çatmasını təmin edir.

Reabilitasiya avtobusu ilkin olaraq Babək rayonunun kəndlərindən əvvəlcədən müəyyən edilən ünvanlardan əlilliyi olan şəxsləri götürərək Naxçıvan şəhərində yerləşən Uşaq Bərpa və Əlillərin Bərpa Mərkəzlərinə çatdırır. Reabilitasiya proseduru bitdikdən sonra isə onları yenidən ünvanlarına qaytarır.