Cənubi Koreyada bir neçə gündür müşahidə olunan soyuq hava mövsümün ən pik səviyyəsinə çatıb.

insanhaqlari.az Cənubi Koreyanın meteorologiya qurumuna istinadla xəbər verir ki, Kanvon və Şimali Kyongi əyalətlərində havanın temperaturu – 20 dərəcə Selsidən aşağı düşüb. Kanvon əyalətinin Pyonçan rayonunda -24,9 dərəcə temperatur qeydə alınıb. Paytaxt Seulda da havanın temperaturu mövsümün ən aşağı (-12 dərəcə) səviyyəsinə düşüb. Külək havanı daha dondurucu edib.

Meteoroloqlar şaxtalı hava şəraitinin qarşıdakı bir neçə gün davam edəcəyini proqnozlaşdırıb.

Ölkənin şimal bölgələri ilə yanaşı cənub hissəsində də havanın hərarəti mövsüm normasından aşağı düşüb. Kvancu və Pusan şəhərlərində havanın temperaturu -10 dərəcəyə düşüb.

Şiddətli qar səbəbindən 21 avtomobil yolu bağlanıb, 20 istiqamətdə bərə səfərləri təxirə salınıb. Soyuq havanın fəsadlarından ölən və xəsarət alanlar barədə məlumat yoxdur.