Uşaq hüquqlarının etibarlı müdafiəsi və təmin olunması ombudsmanın fəaliyyətinin əsas istiqamətlərindəndir.

Bunu Azərbaycan Respublikasının İnsan Hüquqları üzrə Müvəkkili (Ombudsman) Aparatının rəhbəri Aydın Səfixanlı COP29 çərçivəsində “İqlim dəyişmələri şəraitində uşaqların sağlamlıq hüququnun təmin edilməsi” mövzusunda yan tədbirdə çıxışında deyib.

Aparat rəhbəri çıxışında uşaq hüquqlarının pozulması ilə bağlı daxil olan şikayətlərin araşdırıldığını və onların həlli üçün qanunamüvafiq tədbirlərin həyata keçirildiyini vurğulayıb. Həmçinin “Azərbaycan Respublikasının İnsan hüquqları üzrə müvəkkili (ombudsman) haqqında” Konstitusiya Qanununa edilmiş son dəyişikliklər barədə məlumat verərək, müvəkkilin uşaq hüquqlarının müdafiəsi və bir sıra digər sahələrdə mandatının genişləndiyini bildirib, təsbit edilmiş səlahiyyətlərə müvafiq olaraq müvəkkilin təşəbbüsü əsasında təsisatda monitorinq qruplarının yaradıldığını diqqətə çatdırıb.

A.Səfixanlı hər il olduğu kimi, bu il də ombudsman tərəfindən 20 oktyabr-20 noyabr tarixlərində “Uşaq Hüquqları Aylığı”nın elan edildiyini, işğaldan azad olunmuş ərazilərdəki təhsil müəssisələrində bu il Aylıq çərçivəsində ilk dəfə olaraq uşaq hüquqları ilə bağlı maarifləndirmə tədbirlərinin təşkil edildiyini bildirib. O, iqlim dəyişmələrinin insan hüquqlarının, o cümlədən uşaq hüquqlarının səmərəli təmininə mənfi təsir göstərən əsas amillərdən biri olduğunu vurğulayıb.

Ətraf mühitin qəsdən çirkləndirilməsinin və ekoloji cinayətlərin törədilməsinin uşaqların da sağlamlığına mənfi təsir göstərdiyini deyən A.Səfixanlı Ermənistanın uzun illər işğal altında saxladığı Azərbaycan ərazilərində törətdiyi ekoloji cinayətlərdən də danışıb. O, Ermənistan tərəfindən torpaqlarımızda basdırılmış minaların bu gün də mülki əhalinin həyat və sağlamlığı üçün ciddi təhlükə yaratdığını, Birinci Qarabağ müharibəsindən indiyədək 358-i uşaq olmaqla, 3400-dən çox şəxsin mina qurbanına çevrildiyini qeyd edib. Aparat rəhbəri, həmçinin işğal olunmuş ərazilərimizdə otuz ilə yaxın müddətdə ətraf mühitə və biomüxtəlifliyə ciddi ziyan vurulduğunu, ekosid törədildiyini, həmin ərazilərdə müxtəlif nadir bitki və heyvan növlərinin məhv edildiyini, su mənbələrinin zərərli maddələrlə çirkləndirildiyini diqqətə çatdırıb.

A.Səfixanlı istismara yararsız olmasına baxmayaraq, fəaliyyətini davam etdirən və ətraf mühiti ciddi şəkildə çirkləndirən Ermənistandakı Metsamor Atom Elektrik Stansiyasının (AES) təkcə Azərbaycan və Ermənistan üçün deyil, bütün region üçün potensial təhlükə mənbəyinə çevrildiyini də vurğulayıb, Azərbaycan ombudsmanının dəfələrlə aidiyyəti beynəlxalq təşkilatlara müraciət edərək növbəti nüvə fəlakətinin qarşısını almaq üçün həmin AES-in fəaliyyətinin təhlükəsiz şəkildə dayandırılmasını və təcili bağlanmasını tələb etdiyini bildirib.

Aparat rəhbəri beynəlxalq ictimaiyyəti bəşəriyyətin ekoloji təhlükəsizliyinə təhlükə yaradan, habelə sağlam ətraf mühitdə yaşamaq hüququnu kobud şəkildə pozan bu kimi cinayətlərə biganə qalmamağa çağırıb.