Britaniyanın maliyyə naziri Reyçel Rivz büdcə yeniləməsini parlamentə təqdim edib.

O, qlobal iqtisadiyyatın qeyri-müəyyən hala gəldiyini və bunun həm dövlət maliyyələrinə, həm də iqtisadiyyata təsir etdiyini bildirib. Nazir bu büdcə yeniləməsinə yeni vergi artımının daxil olmadığını qeyd edib. Bunun əvəzinə kapital xərclərini illik 2 milyard funt sterlinq artıracağını və bu artımın iqtisadiyyatda inkişaf yaratmaq və müdafiə sahəsindəki öhdəlikləri yerinə yetirmək məqsədini daşıdığını açıqlayıb.

Reyçel Rivz eyni zamanda, yeni maliyyə ili üçün hərbi sahəyə əlavə 2,2 milyard funt sterlinq ayrılacağını təsdiqləyib. O, qeyd edib ki, Müdafiə Nazirliyi avadanlıq büdcəsinin ən azı 10 faizini yeni texnologiyalar, o cümlədən dronlar və süni intellektlə işləyən texnologiyalar üçün xərcləyəcək. Bu addım sektoru gücləndirmək və yeni iş imkanları ilə ölkənin müxtəlif bölgələrində bərpa və inkişaf yaratmaq məqsədini daşıyır. Nazir müdafiə sahəsindəki xərclərin maksimum fayda verməsi üçün yeni bir şuranın yaradılacağını da bildirib.

Qeyd edək ki, Böyük Britaniyada maliyyə naziri hər il büdcəni mart ayında açıqlayır. Bu tarix adətən ilin əvvəlində maliyyə siyasətini, vergi dəyişikliklərini və dövlətin xərclərini açıqlamaq üçün seçilir. Büdcə açıqlanması zamanı hökumət gələn maliyyə ili üçün iqtisadi planlarını təqdim edir və ölkənin maliyyə vəziyyətini necə idarə edəcəyini bəyan edir.