ABŞ-ın bütün xarici istehsal avtomobillərinə tətbiq edəcəyi 25 faiz rüsum yerli vaxtla aprelin 2-si gecə yarısından (Bakı vaxtilə 3 aprel, saat 08:00) etibarən qüvvəyə minəcək.

“Qurtuluş günü” ilə bağlı çıxışında bu barədə danışan ABŞ Prezidenti Donald Tramp bu addımı ölkənin sənaye bazasına təsir edən və milli təhlükəsizliyi riskə atan dəhşətli uyğunsuzluğu aradan qaldırmaq üçün atdığını bildirib.

Tramp bir neçə ölkənin ABŞ istehsalı olan avtomobillərə yüksək tariflər tətbiq etdiyini qeyd edib.

"Bizim şirkətlərimizin heç birinin başqa ölkələrə getməsinə icazə verilmir. Deyirəm ki, bir çox hallarda ticarət baxımından dost düşməndən daha pisdir. Belə dəhşətli natarazlıq sənaye bazamızı məhv etdi və milli təhlükəsizliyimizi riskə atdı", - deyə Tramp çıxışı zamanı vurğulayıb.

O, bu məsələdə keçmiş prezidentləri günahlandırıb.