Azərbaycan Respublikası Prezidentinin Sərəncamına əsasən icra edilən "Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı"nda qeyd olunan Ailə Sağlamlıq Mərkəzlərinin yaradılması və əhalinin tibbi xidmətə əlçatanlığının təmin edilməsi məqsədi ilə bölgələrində yaradılan Ailə Sağlamlıq Mərkəzlərində (ASM) imtiyazlı dərman vasitələrinin paylanmasına başlanılıb.

Artıq muxtar respublika üzrə 10 000-dən çox vətəndaş yaşadığı əraziyə yaxın ASM-lərə müraciət edərək dövlət proqramlarına (şəkərli diabet vəs) uyğun olaraq onlara təyin edilmiş dərmanları rahatlıqla əldə edə biləcək. Bu təşəbbüs vətəndaşların dərman təminatına əlçatanlığı artıraraq sosial rifahın yüksəldilməsinə xidmət edir. Prosesin ilk mərhələsi Ordubad rayonu üzrə başlanıb. Dırnıs Kənd Ailə Sağlamlıq Mərkəzi, Dəstə Kənd Ailə Sağlamlıq Mərkəzi və Vənəd Kənd Ailə Sağlamlıq Mərkəzlərində dərmanların təhvil verilməsi həyata keçirilib. Mərhələli şəkildə davam edəcək bu proses çərçivəsində Naxçıvan Muxtar Respublikası üzrə 32 Ailə Sağlamlıq Mərkəzinin hər birində imtiyazlı dərmanların paylanılması nəzərdə tutulub

Qeyd edək ki, imtiyazlı dərman vasitələrinin paylanması Azərbaycan Respublikası Səhiyyə Nazirliyinin yaratdığı vahid dərman portalı üzərindən icra edilir. Bu yanaşma prosesin şəffaflığını və effektivliyini təmin edərək, dərmanların düzgün bölgüsünə nəzarət imkanı yaradır.

ASM-lər vasitəsilə dərmanların vətəndaşlara çatdırılması səhiyyə xidmətlərinin keyfiyyətinin artırılması və sosial həssas qrupların dəstəklənməsi baxımından mühüm bir addımdır. Bu prosesin daha da təkmilləşdirilməsi üçün aidiyyəti qurumlar tərəfindən davamlı olaraq nəzarət və təhlillər aparılır.

Naxçıvan Muxtar Respublikasında səhiyyə sektorunun inkişafı və əhalinin sağlamlıq imkanlarının genişləndirilməsi istiqamətində həyata keçirilən bu və digər layihələr vətəndaş məmnuniyyətini artırmaqla yanaşı, dövlətin sosial siyasətinin uğurlu icrasını bir daha nümayiş etdirir.