XVI Beynəlxalq Multikulturalizm Məktəbinin iştirakçıları Qubada “Müxtəliflik və Konstitusiya Azərbaycanın multikultural cəmiyyətinin inkişafının aspektləri kimi” mövzusunda mühazirə dinləyiblər. Mühazirəni Azərbaycan Dövlət İnformasiya Agentliyinin – AZƏRTAC-ın hüquqşünası, Azərbaycan Vəkillər Kollegiyasının üzvü Esmira Tağıyeva təqdim edib.

Esmira Tağıyeva mühazirəsində Azərbaycan Konstitusiyasının müvafiq maddələrinə istinadla multikulturalizm ənənələrinin yaşadılmasından və dövlət siyasəti nəticəsində bu sahədə əldə olunan uğurlardan danışıb. Bildirib ki, Azərbaycan çoxsaylı etnik və dini qrupların bir arada yaşadığı çoxmədəniyyətli ölkə olaraq, etnomədəni müxtəlifliyi özünün zəngin sosial bazasının əsas hissəsi hesab edir. Etnomədəni müxtəlifliyin düzgün tənzimlənməsi hər bir multikultural dövlət üçün böyük əhəmiyyət daşıyır. Vurğulanıb ki, Ümummilli Lider Heydər Əliyevin Azərbaycana rəhbərliyi dövründə müxtəlif etnik azlıqların və dini icmaların bir arada yaşaması və bərabər hüquqlara malik olması məqsədilə vacib hüquqi və sosial addımlar atılıb. Bu addımlardan ən önəmlisi 1995-ci ildə Azərbaycan Respublikası Konstitusiyasının qəbul olunması idi. Konstitusiya etnomədəni müxtəlifliyi qorumaqla bağlı yalnız hüquqi təminatlar vermir, həm də bunun praktiki tətbiqini həyata keçirəcək mexanizmləri təsbit edir.

Mühazirədə diqqətə çatdırılıb ki, bu gün Prezident İlham Əliyev əsası Ulu Öndər Heydər Əliyev tərəfindən qoyulmuş multikulturalizm siyasətini uğurla davam etdirir, Azərbaycanda etnik və dini müxtəlifliyin qorunmasına xüsusi önəm verilir.

Esmira Tağıyeva əməkdaşı olduğu AZƏRTAC-ın fəaliyyətinə də toxunub. Azərbaycan multikulturalizm siyasətinin dünyada təbliğ olunmasında, bu istiqamətdə xəbərlərin 8 dildə dünya ictimaiyyətinə çatdırılmasında agentliyin oynadığı roldan danışıb.

Mühazirə iştirakçılar tərəfindən maraqla qarşılanıb, interaktiv müzakirələr aparılıb, suallar cavablandırılıb.

Martın 10-dək davam edəcək XVI Beynəlxalq Multikulturalizm Məktəbində 21 ölkədən 25 tələbə iştirak edir. İştirakçılar müxtəlif mövzularda mühazirələr dinləyirlər, “Öz xalqını təqdim et” adlı musiqili axşamlar da təşkil olunur. Burada iştirakçı tələbələr öz xalqlarının mədəniyyəti, adət-ənənələri ilə bağlı məlumat verirlər.

Qonaqlar, həmçinin Heydər məscidində, Rus Pravoslav Kilsəsində, Dağ Yəhudiləri Sinaqoqunda, Müqəddəs Məryəm Katolik kilsəsində də olacaqlar.