İki təhsil müəssisəsi arasında imzalanmış əməkdaşlıq memorandumuna əsasən, Azərbaycan Dillər Universitetinin (ADU) Konfutsi İnstitutunun çinli müəllimləri və çinşünas tələbələri Azərbaycanın Milli Qəhrəmanı Mübariz İbrahimov adına Biləsuvar Bağça-Məktəb-Lisey Təhsil Kompleksində olublar.

Konfutsi İnstitutundan bildirilib ki, qonaqlar Təhsil Kompleksinin tərkibindəki STEAM mərkəzi ilə tanış olub, şagirdlərlə müxtəlif maraqlı mövzularda söhbət ediblər. Şagirdlərin təqdim etdiyi “110 kitab” layihəsi də qonaqların diqqətinə çatdırılıb.

Sonra müəllim və tələbələr Milli Qəhrəman Mübariz İbrahimovun ev-muzeyinə baş çəkiblər. Görüşdə Çin təhsil sistemi, Konfutsi İnstitutunun təqaüd proqramları haqqında şagirdlərə geniş məlumat verilib, onların sualları cavablandırılıb.

ADU-nun Konfutsi İnstitutunun direktoru Rafiq Abbasov çıxışında Çinin tarixi İpək Yolunun dirçəldilməsi üzrə qlobal “Bir kəmər, bir yol” layihəsinin həyata keçirilməsində tədqiqatlar üzrə ixtisaslaşmış Konfutsi İnstitutunun elmi, tədris və ictimai maarifləndirici fəaliyyətindən danışıb. Qeyd edib ki, görüş ADU-nun tərəfdaş Huçjou Universitetinin yerləşdiyi Çinin Huçjou şəhərinin İbtidai və Orta Təhsil Departamenti ilə əməkdaşlıq proqramının həyata keçirilməsi baxımından mühüm əhəmiyyət kəsb edir.

R.Abbasov ADU-nun Konfutsi İnstitutu tərəfindən Azərbaycan Prezidenti İlham Əliyevin və Ümummilli Lider Heydər Əliyevin Azərbaycan-Çin dostluq əlaqələrinin və əməkdaşlığının inkişafı istiqamətində fəaliyyətinə həsr olunmuş “İlham Əliyev iki qədim xalq arasında dostluğun müasir davamçısı” və “Heydər Əliyev və Çin” kitablarının Çin dilində çap edildiyini diqqətə çatdırıb. İnstitutun direktoru, həmçinin Çin Xalq Respublikasının Sədri Si Cinpinin müasir dövlət idarəçiliyi konsepsiyası və siyasi strategiyasına həsr olunmuş ictimai çıxışlarının əsas tezisləri ilə Azərbaycan dilində materiallar toplusunun və Azərbaycan tarixində ilk Çin dili dərsliyinin nəşr olunduğunu bildirib.

Vurğulanıb ki, bu ilin iyul ayında imzalanmış “Azərbaycan Respublikası ilə Çin Xalq Respublikası arasında strateji tərəfdaşlığın yaradılması haqqında Birgə Bəyannamə”də iki ölkənin təhsil müəssisələrində Çin və Azərbaycan dillərinin tədrisinin təşviqinə, müəllim mübadiləsinin inkişafına, həmçinin Konfutsi institutlarının inkişafına dəstək göstərilməsi zərurəti qeyd olunur.

Təhsil Kompleksinin şagirdləri Çin mədəniyyəti ilə bağlı viktorinada da iştirak ediblər. Qaliblər Konfutsi İnstitutunun kurslarında Çin dilini pulsuz öyrənmək hüququ qazanıblar.

Tədbirin sonunda Konfutsi İnstitutunun müəllim və tələbələri konsert proqramı ilə çıxış ediblər. Çinin xalq romantik mahnıları və melodiyaları səsləndirilib, klassik rəqsləri ifa olunub. Həmçinin xəttatlıq və kağız sənəti üzrə ustad dərsləri təşkil olunub.